Dagur 2

Lentum í Nariobi kl. 6.30 að staðartíma eftir svefnlitla nótt í flugvélinni. Fórum beint í biðsalinn fyrir flugið með Precision air til Tansaníu. Í biðsalnum tókst mér að finna út hvaða átta strákar það væru sem myndu vera að fara í gönguna á Kilimanjaro með okkur Tyrfingi.  Fórum í loftið kl. 8 og fyrir tilviljun lentum við Tyrfingur vinstra megin í flugvélinni og sáum því Kilimanjaro mjög vel þegar við flugum framhjá. Mikið ofsalega er það flott. Lentum á Kilimanjaro international airport í Tansaníu kl. 8.50.  Þar var tekið á móti hópnum og við keyrð í gömlum Toyota Coaster á Kilimanjaro Mountain Resort hótelið í Marangu. Flott hótel þar sem við höfum okkar eigin svalir, og fyrir utan er sundlaugargarður. Vorum komin á hótelið kl. 11 og við steinsváfum til kl. 16 en þá áttum við að hitta manninn sem sótti okkur á flugvöllinn og fá hjá honum frekari upplýsingar um gönguna á Kilimanjaro. Seinnipartinn fór allur hópurinn í tveggja tíma göngu um nágrenni hótelsins og borðuðum svo kvöldmat saman kl. 20.  Allir fóru snemma upp á herbergi til að klára að pakka fyrir gönguna en við megum hafa hámark 15 kg af farangri.

Kilimanjaro séð úr flugvélinni.

Dagur 1

Við Tyrfingur vöknuðum kl. 3 í nótt til að vera komin út á flugvöll kl. 5. Vorum svo heppin að það var engin biðröð við innritunina og við komumst því hratt þar í gegn. Náðum í ferðatékkana sem við vorum búin að panta í Landsbankanum, en það var eini staðurinn þar sem við gátum fengið ferðatékkana í akkúrat þeirri upphæð sem við þurftum eða $640. Flugum í loftið kl. 7.40 og lentum í London rúmlega 12 að staðartíma.  Þar sóttum við töskurnar komum þeim í geymslu og tókum hraðlestina (Heathrow express) á Paddington lestarstöðina.  Þar keyptum við okkur dagsmiða í neðanjarðarlestirnar. Síðan skruppum við í búðir en ekki var nú mikið verslað enda nægur farangur fyrir.  Þurftum að vera komin út á flugvöll aftur kl. 17 til að innrita okkur í flugið til Kenýa. Fengum okkur að borða á flugvellinum og fundum svo sæti þar sem hægt var að horfa út um gluggann á flugvélarnar fyrir utan.  Rosalega er mikil flugumferð í London. Flugum í loftið með Kenýa airline kl. 20. Vegalengdin frá London til Nairobi er 6846 km, flugið tók 8 klst. og klukkan í Kenýa er þremur tímum á undan Íslandi.

Gleðidansinn

Ferðatékkar

Það er einungis hægt að greiða aðgangseyrinn að Kilimanjaro með ferðatékkum og það kostar $640 og ekki hægt að gefa til baka. Tókst loksins að finna ferðatékka í akkúrat þessari upphæð í Landsbankanum í Leifsstöð. Annars staðar var einungis hægt að fá 500 og 100 dollara tékka.

Einn og hálfur sólarhringur í brottför.

Jökullinn á Kilimanjaro

Frá árinu 1912 hefur jökullinn á Kilimanjaro minnkað um 82%. Árið 1989 var stærð jökulsins 3,3 km².  Gert er ráð fyrir að allur jökull verði horfinn af Kilimanjaro árið 2015-2020 ef hann heldur áfram að bráðna á sama hraða og hann hefur gert hingað til. 

 

Hvaða áhrif hefur það ef allur jökull hverfur af Kilimanjaro? Hvernig verður ferðamennskan á fjallinu ef þar er ekkert vatn að hafa? Jökullinn á Kilimanjaro sér íbúum í þorpunum í kringum fjallið fyrir því vatni sem þeir þurfa; drykkjarvatni, vatni í áveitukerfi akranna, vatni til raforkuframleiðslu o.fl.  (Heimild; Henry Stedman 2006. Kilimanjaro, the trekking guide to Africa´s highest mountain).

Útbreiðsla jökuls á Kilimanjaro árið 1962 og árið 2000.

Þjálfun fyrir Kilimanjaro

Þegar búið var að taka ákvörðun um að ganga á Kilimanjaro var næst á dagskrá að koma sér í gott form.  Þó öll þjálfun sé góð það er besta þjálfunin fyrir göngu að ganga. 

• Við fórum rólega af stað og þjálfunin í febrúar var ganga og hjólreiðar í samtals 10 klukkustundir.
• Í mars var bætt við skíðagöngu þegar snjór leifði og var æft í 18 klst í mars.
• Í apríl kom rope jóga í staðinn fyrir skíðagönguna. Eins fórum við að færa okkur af láglendinu og uppá fjöll. Gengið var á Esjuna, Móskarðshnjúka, Vörðufell og Búrfell í Grímsnesi. Samtals 35 klst í apríl.
• Vorum löt í maí, ekki nema 28 klst. M.a gengið á Ingólfsfjall, Vörðufell, Þríhyrning og Esju, farið nokkrum sinnum á öll fjöllin neima Esjuna.
• 37 klst í júní. Farið á Ingólfsfjall, Esju, Heklu, Leggjabrjót og Hvannadalshnjúk.  Fórum á Hvannadalshnjúk með Einari í Hofsnesi, 14 klst ferð í glampandi sól og stafa logni.  Er 12 mínútum fljótari á Ingólfsfjall heldur en ég var í mars svo þjálfunin er greinilega að skila einhverju.
• 43 klst í júlí. Gengum bæði á Stóru- og Stöku- Jarlhettur, Þríhyrning, Ingólfsfjall og Vörðuskeggja.  Auk þess tókum við fjölskyldan að okkur að vera skálaverðir í Múlaskála í Lónsöræfum í eina viku og þá kannaði ég allar helstu gönguleiðir í nágrenni skálans og gekk m.a. á Kollumúla.
• Í ágúst er svo á dagskrá fimm daga gönguferð um Skaftárhraunið ásamt einhverjum styttri ferðum. Samtals tóku gönguferðir ágústmánaðar 38 klst.

Gönguleiðin á Kilimanjaro

Farið verður upp Rongai leiðina og niður Marangu leiðina.

 

Hæðarprófíll af Rongai og Marangu leiðunum.

Bólusetningar og lyf

Við þurftum að fríska uppá bólusetningar við polio, stífkrampa og barnaveiki.  Svo vorum við bólusett við lifrarbólgu A, taugaveiki og yellow fever.  Ágætt er að fara í bólusetningu a.m.k. tveimur mánuðum fyrir brottför þar sem við þurftum að koma í sumar sprauturnar með mánaðar millibili.

Við fengum Malaron við malaríu. Immodium og Siprox við niðurgangi, Diamox og adalat oros við háfjallaveiki og svo auðvitað sterk verkjalyf og bólgueyðandi lyf.

Notum Mygga sem skordýrafælu og okkur var ráðlagt að taka með okkur flugnanet til öryggis ef vera skyldi gat á flugnanetinu í tjaldinu.

Við vitum ekki annað en allt vatn verði soðið fyrir okkur á fjallinu en til öryggis erum við með sótthreinsitöflur fyrir vatn.

 

Dagsetningin

Nú var að finna heppilega dagsetningu fyrir ferðina.  Á heimasíðunni hjá Exodus (exodus.co.uk) var listi yfir allar brottfarir og merkt við hvort ferðin væri farin á fullu tungli eða ekki.  Við fundum ferð sem var frá 22. ágúst - 31. ágúst og var farið Rongai leiðina upp og niður Marangu leiðina.  Fullt tungl var auðvitað skilyrði.  Þannig höfðum við líka rúma sex mánuði til að koma okkur í gott form. 

Í framhaldinu tók við nokkurra klukkustunda vinna við leit að upplýsingum á netinu, bæði fróðleik um fjallið og eins ferðasögur þeirra sem hafa farið á fjallið.  Á vefsíðunni http://www.climbmountkilimanjaro.com eru góðar upplýsingar um Kilimanjaro en Henry Stedman sem heldur úti vefsíðunni hefur gengið allar sjö leiðirnar á Kilimanjaro. Bókin hans Kilimanjaro: The trekking guide to Africa´s highest mountain fannst mér einnig mjög gagnlegt að lesa og þar eru góðar lýsingar á öllum gönguleiðum og því sem þarf að hafa í huga varðandi svona ferð.

Ákvörðun tekin

Þegar ég var níu ára sá ég mynd af Kilimanjaro og ákvað að einhvern daginn ætlaði ég að fara og sjá þetta fjall. 

1. febrúar sá ég svo auglýsingu í dagblaði um ferð með bresku ferðaskrifstofunni Exodus á Kilimanjaro.  Ég fór á netið og aflaði mér frekari upplýsinga og ákvað í framhaldinu að nú væri minn tími kominn og 27 ára gamall draumur mundi rætast.  Þá var að finna ferðafélaga. Ekki vildi maðurinn minn koma með þannig að ég spurði bróður minn.  Hann spurði hvort þetta væri ekki ógurlega erfitt og þegar ég sagði jú örugglega þá var hann til í tuskið.